کاک فه‌تحوڵڵا ره‌زایی خه‌ڵکو ده‌گاو داریانی بـــڕێو جه‌ واتاو وه‌ڵیناش ( پیشینیان ) پێسه‌ شێعرێ رێکێ وسێنه‌ :

واتــــه‌و وه‌ڵینـا شیـرین و بـــه‌رزا            نگاداریشـــا پــه‌ی ئێمه‌ فــــه‌رزا

خاسشا فه‌رماوان واته‌شا راسا             تووڵه‌ به‌ خامی چه‌میۆوه‌ خاسا

نــه‌زانی عه‌یبا ، په‌رسا به‌و دانــا             غافــڵ نــه‌بینــه‌ هانا سه‌د هانا

عاقــڵ حاڵیشا به‌ یــه‌ک ئیشاره‌            به‌ڵام بێعه‌قڵ مه‌ر ده‌یش قه‌ناره

که‌سێو که‌خه‌مو ئابڕویش نه‌وه‌رۆ‌            هه‌ر یاگێو وا بو چا شه‌نه‌ کـه‌رو

مانگه‌ مه‌مانو جه‌په‌شته‌و هه‌وری           نه‌بـی بـه‌ یـاروو نامــه‌ردا ده‌وری

ئـه‌ر گــوڵ نیــه‌نی مه‌به‌ بـه‌ دڕه‌ی           نـه‌بـی بایـسو ئـــاژاوه ‌و قــڕه‌ی

ئێندنه‌ لوه‌ باوان جلت چێر یــــاوا            نه‌کـه‌ری کارێــو بو جه‌نگ و داوا

کاکه‌ مه‌که‌ره‌ قسێ بێ هوشی           ماچا ، دیـــوارا هه‌نێشا گوشێ

قسێوه‌ت که‌رده‌ که‌وته‌ سی ددانێ        به‌ وێت مه‌زانی گنـو سی یانێ

نه‌وس گێریش که‌ما په‌ڕوو مشتێوێن -  به‌ڵام وه‌رش ده‌ی ده‌رو ده‌شتێوێن

خرابه‌ مه‌واچه‌ تا خراب نه‌ژنــه‌وی        هه‌ر خاسه‌ که‌ره‌ چه‌نی ئێدوئه‌وی

هه‌ر وه‌ختێو ملی ئه‌و شارو کورا            چه‌مێ وێـت بینه‌ با قه‌درد گێرا

په‌ی که‌سێ مره‌ په‌رێت مه‌رده‌ بو       ئاد جه‌ تو خاسته‌ر ئیمان هه‌رده‌ بو

هه‌رکه‌س به‌ ته‌ماو مامو و لالوی بو        ئارو بێ نان و سه‌وای بێ دو بو

نان په‌ی نانه‌وای گوشت په‌ی قه‌سابی  کاڵا په‌ی باڵاو مه‌ردی حه‌سابی

هه‌رتاکو فه‌رز هه‌ن سننه‌ت به‌تاڵا         کــه‌لامت حـه‌ق بو بــا واچــا تاڵا

دوست دڵسوزا با جارجار گراونوت        نه‌خه‌ڵه‌تیه‌ینه‌ ئه‌ر دوژمن لاونـوت

ئه‌وه‌ڵ خه‌یره‌ت بو په‌ی قه‌ومو خوێشا    دماتـه‌ر گێــره ده‌سو ده‌روێـشــا

قه‌وم گوشتد بوه‌رو پێشه‌د مه‌ماڕو        ئه‌غیار په‌یش کریو ئه‌ندامید هاڕو

بێوه‌فای سفڵه‌ چن وه‌رگی موه‌رو    چه‌نی شوانه‌ی و مه‌ی شیوه‌ن که‌رو

ئه‌ر خودای گه‌وره‌ په‌ێ دو به‌ مارا        ره‌حــم مـه‌کـــه‌را بــه‌ گــه‌ڵاو دارا

زاڵم زه‌واڵش پـــه‌ی میــاۆو راسا        پـه‌لـه‌ مه‌کـــه‌ره‌ سه‌برد بو خاسا

ماچا وه‌رێسه‌ی تندنه‌ زوو بــڕیـــو        هه‌رپاسه‌ ته‌پڵوو به‌دنامی زڕیــــو

کـار کانگـه‌ ترازیـو ، برا یـاوا بــرازا‌        که‌سی مه‌کــه‌ره‌ مه‌حره‌مــو رازا

براییما برایی ، جـیا بو کیــسه‌ما        تا کــه‌س نه‌تــاۆو بو ده‌سیسه‌مـا

نه‌ده‌ینـه‌ سه‌رو پــرده‌و نامــه‌ردی       با نه‌بو مایه‌و کـزی و ره‌نگ زه‌ردی

رازیــه‌نا خودا زوو بدو مـــه‌رگـــم        پا شه‌رته‌ نامـه‌رد نه‌که‌رو به‌رگـــم

هه‌رکه‌سێو شێوه‌ش راسه‌ن و پاکا    سه‌ربه‌رزو ئـازاد بێ ته‌رس و بـاکا

جوانه‌نی یا پیر ئه‌گه‌ر بی ئه‌میـر        هوشیار به‌ خودات به‌رنه‌شو جه‌ویر

فه‌راموش نه‌بو شوکرو نه‌عمه‌تی       تـا وارو سـه‌رت هه‌ورو ره‌حمه‌تی

ره‌زایی گوش ده‌ پی واتـه‌ وه‌شا       وێت به‌شدار که‌ره‌ چی گردو به‌شا